Tribulation hmain Secret Rupture a awm dawn lo

1.MITHIANGHLIM LAWR CHU!

He zirtirna hi thil thar a ni lo. Kum zabi 16 naah khan Jesuit Catholic Mithiam Joseph Ribera bul lo tan niin a hriat a. AD 1825 vel khan Samuel R. Maitland khan a rawn pawm zui ta bawk a. AD 1830 khan Scotland nula kum 17 mi Margaret McDonaldi khan inlarna anga hmu in Messia hi vawi hnih lo la kal leh turin a lo sawi bawk a, chumi hnuah J.N Darby, plymouth Brethen dintu khan a rawn pawm ve leh a. Chumi hnuah protestant ah a rawn kangkai chho ve leh a, zau taka a lo darh theih nan C.I. Scofield-a’n Scofield Reference Bible hmangin tan a lo la chho leh ta bawk a ni.

Dispensationalist ten Messia lo kal lehna hi chhawng hnihin an hrilhfiah thin- a vawi khatna= (rupture= mithianghlim lawr), a vawi hnihna= Puanzarna (A mithianghlimte nena a lo kalna) tiin. Chung hun hnihte inkarah chuan kum 7 a tlazep turin an sawi a (Daniela hapte 70-na), chutih hun chhung ngei chuan Antichrist in Judate hnenah kum 7 atan thuthlung a siam ang a, Jerusalemah Temple a dinthar leh ang. Mahse kum 3.5 hnuah Antichrist chuan a thuthlung chu a thiat leh ang a, Judate chu a tiduhdah leh si ang a, Judate tan hrehawm nasa tak a awm ang a, a tawpah Messia chu ropui takin a lo kal dawn a ni, tiin an sawi thin.

Thup. 1:7 Ngai teh u, ani chu chhumte nen chuan a lo kal dawn e; mit tinrengin a hmu ang a, a chhuntute ngei pawh khan; khawvela hnam zawng zawngin amah an tah bawk ang. A ni, Amen. tih thu hi PUANZARNA (revelation) tiin an vuah a. Rupture thung erawh chu hmuh theih loh, thawm nei lo leh a ruka a kohhran tana a lo kalna angin an sawi thin a ni.

2. RUPTURE CHUNGCHANGA BIBLE VERSE AN TAN CHHAN CHU:

‘Lalpa ngei chu au thawm nen, vantirhkoh chungnung ber aw nen, Pathian tawtawrawt ri nen, van atangin a lo chhuk dawn si a; tin, Kristaa thi tawhte chu an tho hmasa ang a; chu mi hnuah chuan keini nunga lo la awm rengate hi boruakah Lalpa hmuak turin anmahni rualin chhum zingahte khian lak chhohvin kan awm ang; chutichuan kumkhuain Lalpa hnenah kan awm tawh ang.’ (I Thes.4:16)

Helaia ‘chhum zingahte khian lak chhohvin kan awm ang’ tih ber hi an tan chhan chu a ni e. Lo chhinchhiah teh, ‘Vanah’ a tih loh hi aw, ‘chhum zingah’ tih mai a ni e.

‘Au thawm’, ‘aw’, ‘tawtawrawt ri’ tihte hian aruka lo kal leh thil reh ruih lam chu a kawh loh zia kan hre thei nghal awm e. A lo kal lehna chu ‘beng chheng’, ‘thawm ri nasa tak’ a ni tih a lantir zawk si a. Hei hi thil inthukru leh reh vung vung, a ruka lo kal sawina a ni lo tih chu kan hrethiam vek awm e.

*Messia lo kal lehna, ‘ruk ru angin’ tih hi a ruka lo kal lam sawina a ni lo, ‘a lo kal hun hriat loh’ tihna lam a ni zawk e. Amah Yahshua ngeiin a hun leh ni hriat lawk a nih loh thu sawinan a hmang tawh a,‘a ruka lo kal’ tih lam hawia ngai tute hian an duh angin an pawtfan ve mai mai tih I hria ang u.Yahshua tawngkam chu:

“..rukru a lo kal hun tur in neitu in hria se la, a veng ang a, a in a reh pawhtir lovang. Chuvangin nangni pawh inring rengin awm rawh u, in rin loh hunah Mihring fapa a lo kal dawn si a”..

He thu hian ‘a hun’ chung chang zawk a sawi tih chu kan hrethiam vek e.A ruk a nih loh turzia a sawina pawh hi: “Kawl, chhak lamah a phe chhuak a, thlang lam thleng pawhin a lang thin a, Mihring fapa lo kal lehna chu chutiang chu a ni dawn si a”

Messia lo kal lehna nena inkaihhnawih thu reng rengah hian ‘a ruka thil thleng tur’ tih lam hi pakhat mah a awm lo bawk a ni.

3. NOVA DAM LAI ANG:
A lo kal lehna tur thu a sawi khan Nova dam laia thil thleng nen a tehkhin a nih kha, Nova khan tuilet tur thu chu a hre ngei a, nimahsela vanah hruai chhoh a ni bik lo. Misualte khan an hre lova, Tuilet chuan chawp leh chilhin a rawn nang thut! Ringtu leh ring lotu chungah thawk leh khatah a lo thleng thut a ni.

Tuilet hma kum 7 ah Nova kha lak bo a ni reng reng lo, manganna kha mifel leh misual chungah a lo thleng rual a, mifel chu chhanhim a ni ta a ni zawk. Hetiang chiah hi Messia lo kal huna thil awmdan tur chu a ni e.. Messia hian a lo kal hma kum 7 ah mithianghlimte hi lo lawr ta se, misualten a lo kal leh dawn hun an lo chhut lawk thlap thei ang a, tu lakah nge rukru anga a rawn kal theih tak ang, an lo inrin lawk vek theih si te chuan?

‘Thlarau Thianghlim a awm tawh dawn lova, a lo kal hun hre mahse an sim thei tawh dawn hleinem’, I ti a ni mai thei, mahse Thlarau Thianghlim tel lo chuan engtin nge Judate chu an harh theih reng reng ang? Vantirhkoh meuh pawhin chanchin tha zuk hrilh sela, Thlarau thianghlim tel lo chuan engtin nge an sim theih chuang ang?Awlsam taka Vanram luh tumten awlsam taka luhna kawng an zawn nasat luatah Bible thute hi an duh angin an pawt fana, dik mang hlei lovin ‘hrehawm tuar lova mithianghlimte zinga tel ve theih nan’ an duh angin an sawi fiah ve mai hi a pawi em em a ni.

Apostolte kha chuan, ‘Hrehawm tam tak tuarin Pathian ram kan lut tur a ni” an ti a sin maw le.Amah Yahsua ngei pawhin ‘mahni hrehawm pawisa lo leh a tawp thlenga tuar peih a piangte chauh chhandam an nih tur thu’ a sawi bawk a sin maw le!

Ngaihsam taka awm a, Mithianghlim lawr huna lak chhoh daih kan nih tur lam min zirtir lova, tawngtaia ngaihven tlat tur hian Thuthlung Tharah hian vawi 6 min hrilh zawk a ni e.Ngaihven lote chuan engmah an hre dawn lo.

Mithianghlim lawr a awm hmasak daih te chuan tupawhin a lo kal hun tur chu  an chhut chhuak thei vek ang chu! ‘Muanna leh himna’ tia an sawi lai takin boralna an chungah a lo thleng phut zawk dawn a ni e, chu chu thima awmte tan chuan ‘rukru anga a lo kalna’ chu a ni zawk ang (II Thes.5:3,4)

Mat.13:24-30 kha ngun taka I en chuan hmelmapa in lovah buh lem a lo theh ve ringawt a, chu chu chhiahhlawhten lak khawm mai an dil a, nimahsela buhseng (Messia lo kal) thlenga to za tura tih an ni zawk. Buh seng hun a lo thlen hunah BUH LEMTE chu LAK KHAWM HMASAK ZET A, HAL tura tel khawm tur a ni zawk a ni. BUH TAK LAK KHAWM HMASAK THU AWM NGHAL LO CHUAN!

Mithianghlim lawr awm hmasak ringtuten engnge an sawi tak ang?An sawidan chu hemi thu kalh zawng chiah chiah hi a ni- ‘Buh tak chu lak khawm hmasak zet hnu kum 7 ah buhlemte chu lak khawm an ni dawn’ an ti hem mai.

Scofield reference Bible pawhin hei hi chu a sawi dik lo ve tho mai, “He khawvel hun a lo tawp hian buh lemte chu hal tura chheh hran an lo ni ta a, nimahsela, buh tak chu buh ina lak khawm a ni hmasa ang” zu ti teh daih a (Page 1016, footnote)

4. NIKIN NI LEH MITTHITE THAWH HUN:

“Kristaa thi tawhte chu an tho hmasa anga,… keini pawh boruakah Lalpa hmuak turin” (I Thes. 4:16,17)

Engtikah nge mitthite chu kaihthawhin an awm dawn? Nikin niah maw le.  Helaia ‘Boruaka Lalpa hmuak’ tih thu, mithianghlim lawr chungchang sawinaa ngaitute hian hei hi an ngaihtuah thelh hlauh. Boruaka Lalpa hmuak tura kan kal hun tur hi mithianghlim lawr a ni lova, ‘nikin ni ngei’ sawina a ni zawk e. Hemi hnu kum 7 thlenga khawvel la kal zel tura an sawi hi belh chian a dawllo tak zet.

Joba chuan heti hian a lo sawi tawh a, “..chuvangin mi an mu a, an tho leh lo: VAN AWM LOH HMA LOH CHUAN AN THANGHARH LOVANG, an muhil kaihthawh an ni hek lovang (14:12)

Engtikah nge Van chu a AWM LOH tak ang? Petera’n min hrilh leh hlauh- “Ni mahsela Lalpa ni chu rukru angin a lo thleng ngei ang, chumi niah chuan VANTE CHU NASA TAKA RIIN A BORAL ANG…” (II Pet.3:10). “Chumi ni a thlen avangin VANTE lo kangin a BORAL ang a, thil bulte chu meia em tuiin a awm tawh ang (3:12) tiin.

Marthi pawhin Lazara thawh hun tur chungchangah: “Nikin ni a thawhlehnaah chuan a tho leh ang tih ka hria e” (Joh.11:24) a ti a, heta Marthi thusawi hi a dikzia nemngheh nan Yahshua pawhin heti hian a lo sawi tawh a:“..Tupawh fa hmua ring a piangin chatuana nunna nei se la, tin keiin NI KIN NI-AH chuan a ni chu ka kai tho vang” a ti a…. Pa mi tirtu in a hip loh chuan tumah ka hnenah an lo kal thei lovang; tin keiin NI KIN NI-ah chuan a lo kala chu ka kai tho vang” (John. 6:40,44). Chang 54 naah pawh Ni kin ni a kaihthawh tur thu hi a rawn sawi leh bawk.

Ngaihtuah chiang ang aw, mitthite thawh hun tur chu ‘Nikin ni-ah’ a ni a, mitthite thawh hun leh boruaka Lalpa kan hmuah hun’ a inrual dawn a, mahse chumi hnu kum 7 thleng khawvelah mite an la awm si chuan engtin nge ‘Ni kin ni’ a nih daih theih ang le?

Rupture tan chhantute hian khi mi chang (I Thes.4:16,17) khi chu lo tan chhan ve tawh lo mai rawh se.

5. SAKAWLH CHUAN MITHIANGHLIMTE A DO ANG A, A HNEH ANG:

“Tin, mi thianghlimte a do leh a hneh phal a ni a, chi tinreng te, mi tinreng te, tawng tinreng te, hnam tinreng te chunga thuneihna a hnenah pek a ni bawk a.”(Thup.13:7)

He thu pawh hi hrehawm pumpelh zawnga rupture-a lak bo daih inringte hian an sawi mam thei lo bawk. Thil kal tawh hnuah bel phet an tum bawk ang. Sakawlh (Antichrist) leh mithianghlimte hi inchiahpiah hun a awm dawn tih a chiang a, rupture a lak bo an nih daihte chuan engtin nge Sakawlh hian a hneh theih tak ang le? Lal Isua lo kal hunah Danbawhchhepa, Boral fapa chu tihhlum a ni chauh dawn si a..

“Tuman engmahin tihder che u suh se; tluksanna chu a lo thlen hmasak zeta Dan Bawhchhepa, boral fapa chu a lo lan loh chuan chu mi Ni chu a thleng dawn  si lo va… Dan Bawhchhepa chu a lo lang tawh ang, Lalpa Isuan ani chu a kaa thawin a tihlum ang a, a lo kala inlarnain a tiboral ang.” (II Thes.2:3,8) tih ziak a ni si a.

Hei hi a tawng bul lam atangin kan la en tha leh ang.

6. MESSIA VAWI HNIH A LOKAL NAWN ANG MAW?

Rupture ringtute chuan Messi hi vawi khatnaah lei thleng lovin a rukin a lo kal phawt ang a, a vawi hnihnaah ropui takin a lo kal leh ang, tiin an sawi thin a.

“chutiang bawkin Krista pawh mi tam tak sualte kalpui tura vawi khat hlana awm tawhin, chhandamna hmu tura amah lo nghaktute hnenah chuan sual tel lovin vawi hnihnaah a lo lang leh ang.” (Heb.9:28)

Helaiah hian Messia lo kal vawi hnihna kan hmu a. Messia chu a rukin a lo kal phawt ang a, kum 7 hnuah a lo kal leh ang, tia zirtir thin tute hian Messi lo kal vawi hnihna mai bakah VAWI THUMNA thu an zirtir ta daih mai tihna a ni a, hei hi dik sela chuan Bible ah hian Messi lo kal VAWI THUMNA niawm tura ngaih theih tur hi engmah a inziak si lova, Bible pawn lam atangin zirtirna an seng lut tihna a ni.

“Pathian duhzawng in tih hnuin thiltiam chu in hmuh theih nan chhelna in ngai asin.Rei lo te achinah Lo kal tura chu a lo kal dawn si a, Rei a ril tawh lo vang.” (Heb.10:36,37)

Messia lo kal hma loh zawng ringtute hi chhel taka awm tura fuih kan ni zawk e. Messia lo kal tinzawn chunga fuihna hi kum sarih lo hmakhalha thil thleng tur angah engvangin nge kan ngaih tlat lem ang?

“Chutichuan, unaute u, ‘Lalpa lo kal hma loh zawng’ chhel takin awm rawh u… Nangni pawh chhel takin awm rawh u; in thinlung tinghet rawh u; Lalpa lo kalna chu a hnai tawh si a (Jak.5:7,8)

A lo kal hmaa a ruka rupture a awm a, a kianga awm tura an inngaih si chuan engvangin nge Lalpa lo kal hma loh zawng chhel taka awm a tul kher ang?

“ Ka lo KIR leh ang a, ka hnenah ka la ang che u” (joh.14:3)Yahshua hian a lo kal hunah a ni, a hnena min lak zawk dawn ni.. Min la zet ang a, chumi hnu kum 7 ah a lo kal leh ang tih a sawi lo hrim hrim e.

7. TAWNG BUL LAM ATANGIN:

A ruka mithianghlim lawr (rupture) leh a lo kal lehna thenhrangtute hian a tawng bul lam atanga chhuiin Messia lo kal lehna hi ‘chhawng hnih ngei a ni’ tih tan chhan atan greek tawng ‘parousia’ tih leh ‘apokalupsis’ tih thute hi an lek lam hle a, hun hrang leh thil thleng hrang daih tur anga sawi nana an hman nia an ngaih hi kan bel chiang dawn a. Heng thumalte hi thawhkhata Messia lo kal lehna sawi nana hman kar thlak an nihdan leh hun hran daiha thil thleng tur sawina an nih lohzia kan chhui dawn a ni- ‘Chhawng hniha a lo kal leh tur sawina a nih reng reng lo’

Greek thumal 6, Messia lo kal lehna nena inkungkaihte han tar lang ila:

1) PAROUSIA: Hei hian a tum ber chu ‘rawn chenchilh ngei leh rawn kal a, rawn thleng ngei’ sawina a ni. Jak. 5:7 ‘Lalpa lo kal (Parousia) hma loh zawng’ chhel takin awm rawh u.Parousia hi Lalpa lokal lehna chung changa vawrh lar ber a ni a.

He thu hian a tum ber chu ‘rawn kal ngei leh rawn thlen chilh ngei’ a kawk a ni. A ruk tit teta thil tih sawina a kawk lo hrim hrim a ni. Eg, “Tita lo kal (parousia) chuan min thlamuan a”(II Kor.7:6) a Tirh.Paula tawngkam ang hi a ni. “Tin, Stephana te, Phortunata te, Akaika te an lo kal (Parousia) hi ka lawm a ni (I Kor.16:17) te, “Chutichuan in hnena ka awm leh dawn (parousia) avangin..Phil.1:26 ahte hian thlen chilh ngei a a kawk a ni.

Tichuan, he parousia tho hi a lawm rupture ringtuten an sawi lar em em chu ni ta a, a ruka lei thleng lova lo kal phawt tur anga an ngaih tak chu!Paula lah chuan he thu mal tho hi I Thes.4:15-17 a Lalpa lo kal lehna (parousia) atana a lo hmang diam tawh bawk si a;  A ruk arala lo kal tur leh Lei lo tleng lo tur sawina zu ni hauh lova!

A nih leh parousia (a lo kal) hun chu hrehawmna lo thlen hma a ni thei angem le? Ni thei lul lo mai.

IIThes. 2:1 kan en chuan, “Nimahsela unaute u, kan Lalpa Isua Krista lo kalna (parousia) leh a hnena kan han inkhawm tur thuah chuan” tih thu kan hmu bawk. Heta parousia hi “Dan bawhchhepa, boral fapa a lo lan loh chuan chumi ni chu a thleng dawn si lo” a ti zawk a ni.

Danbawhchhepa lan fel hnuah a ni Lalpa lo kal lehna (parousia) chu a thlen dawn zawk ni. Danbawhchhepa a lo lang ang a, Lalpa Isua lo kala (parousia) inlarnain (epiphaneia) a tiboral ang (II Thes.2:8)

He parousia ngei hi thawhlehna lo awm hun tur leh chhum zinga lak chhohva kan awm hun tur zawk chu a ni e.

Petera’n Lalpa lo kal lehna a sawiah pawh khan he parousia hi a hmang bawk thin a ni. II Pet.3- “A lo kal lehna (parousia) thu tiam kawngah chuan, Lalpa ni chu rukru angin a lo thleng ngei ang; chumi niah chuan vangte chu nasa taka riin a boral ang”

Parousia thumal hmanna ah hian a ruka rupture awm tur ang leh tawpna hun a thlen hmi kum 7 a thleng tur a nihna kawng reng reng a awm lo a ni.

Hei hian a ti chiang khawp mai:

“Nova Dam lai ang bawk khan Mihring fapa lo kal lehna (parousia) chu a ni ang” (Mat.24:37). He thu vek hi Luka ziakah chuan “Nova dam laia thil awmzia ang khan, mihring fapa lo kal lehna (apokalupsis) nite chuan a awm bawk ang; Chutiang bawkin mihring fapa hi a rawn inlar (apokalupsis) ni chuan a awm ang (Lk.17:26,30)

Heng thu ziakah te hian Messia lo kal lehna (parousia) leh Messia inlarna (apokalupsis) chu hun thuhmuna thil thleng tur a nih a lang chiang em em a ni..thil hrang daih leh hun hrang daih anga sawi chi a ni lo.

2) APOKALUPSIS: Inlar, ualau taka Puanzar/puan chhuah (revealed) sawina a ni. II Thes.1:7 “Lalpa chu.. van atanga a inlar (apokalupsis) hunah..

I Kor.1:7 ” Kan Lalpa Isua Krista INLARNA (apokalupsis) chu nghakin…

II Thes.1:7-10 “Lalpa Isua….a INLAR (apokalupsis) hunah a tihrehawmtu che u chu hrehawmnaa thungrulh leh…Pathian tan thil fel tak a ni si a” tih te ,

I Pet.1:7,13 ah pawh: In rinna fiahna, rangkachak meia fiah hnu pawha boral thin aia hlu zawk chu, Isua Krista inlar (apokalupsis) hunah chuan fakna leh chawimawina leh ropuina tur a lo nih theih nan.

Khing verse atanga kan hriat fiah tur chu, Lalpa Isua inlarna (apokalupsis) hun chu kan Lalpa kan hmuh hun tur chu a ni a, chu hun chu ringtuten kan nghah chu a ni zawk, rupture hi hun hrang a ni lova, apokalupsis pawh hi hun hrang a ni hek lo, heng hunte hi hun thuhmunah kan la hmachhawn zawk dawn a ni.

Tichuan, greek tawng atanga kan zir chian pawhin Lalpa lo kal lehna chu thawh hniha rawn thleng tur a nih lozia chu parousia leh apokalupsis atangte hian kan hre thei ta a nih chu.

3)EPIPHANEIA: Hei hian tarlan a tum ber chu inpuanchhuahna leh ropuinaa inthuama lo kal Messia a tar lang bik. I Tim. 6:14 “Kan Lalpa Isua rawn inlar (epiphaneia) leh hma loh chuan thupek kha thianghlim tak leh sawiselbova pawm turin”

II Thes.2:8 ‘Dan bawhchhepa chu a lo lang tawh ang, Lalpa Isuan a ni chu a kaa thawin a tihlum ang a a lo kala INLAR NAIN (epiphaneia) a tiboral ang”

I Tim. 6:14 ” Kan Lal Isua Krista rawn inlar (epiphaneia) leh hma loh chuan thupek kha thianghlim tak leh sawisel boava pawm turin..

4) PHANEROO: He thumal hi chuan ‘lan dan’ a kawk. I John.3:2 “Amah a lo inlar (phaneroo) chuan, amah angin kan awm dawn”

I Pet.5:4 ..Tin, Beram vengtu Lalber chu a lo lan (phaneroo) hunin, ropuina Lallukhum vuai thei lo chu in hmu ang.

Hetah pawh hian a ruka a lo kalna lam ni lovin, langsar taka a lo inlar hunah Lallukhum chu kan hmu dawn tih a sawi chiang a, a ruka a lo lanna lam a hawi lo hrim hrim a ni.

5) ERCHOMAI: Hmun pakhat atanga kal chhuak a, hmun danga kal emaw, kal chhuak, tawlhsawn hrim hrim sawina atan he thumal hi hman a ni. Lk.19:13 “A kal dawnin a bawihte sawm a ko va, an hnenah rangkachak tangka sawm a pe a, an hnenah, ‘Ka lo thlen (erchomai) leh hma loh zawng hei hian lo sumdawng rawh u,’ a ti a. Mat.24:44.. in inrin loh hunah mihring fapa a lo kal(erchomai) dawn si a.

Erchomai pawh hi parousia nen khan hun thuhmuna thleng tur a ni tih hi Mat.24 ah bawk khan kan hmu leh a:

‘ Tin, Nova dam lai ang bawk khan mihriang fapa lo kal lehna (parousia) chu a ni ang’, chuvangin nangni pawh inring rengin awm rawh u, in rin loh hunah Mihring fapa a lo kal (erchomai) dawn si a’ (Mat.24:37,44)

6) HEKO:Thleng fel chat sawina a ni; ka kal a, heta hi ka thleng e, tihna ang deuh a ni. Thup. 2:25 “In neih sa erawh kha chu ka lo kal (heko) hma loh chuan vawng tlat rawh u.

Heko leh erchomai hi hetah hian hman kawp a ni leh chiah bawk

Heb.10:37 Rei lote a chinah lo kal tura (erchomai) chu a lo kal (heko) dawn si a.Khing thumal 6 te khi Lalpa Isua lo kal lehna sawi nana hman vek an ni a, a ruka a lokalna leh a let leh daihna lam sawina emaw, a lo kal hma kum 7 sawina lam a ni lo va, hun inchher chhuan (lo kal nawn) sawina a ni hek lo tih I hria ang u.

Heko leh parousia kha Peteran a hmang kawp veleh thung bawk a:

“A lo kal lehna (parousia) thutiam chu khawiah nge?(II pet.3:4); heti hian a chhang a, “Lalpa ni chu rukru angin a lo thleng (heko) ngei ang (II pet.3:10)

Tichuan, a chunga kan sawi, a lo kal lehna sawina greek tawng 6 te khi thu thuhmun sawi nana hman kar thlak kual a ni tih kan hrethiam tawh ang a. Messia lo kal lehna hi chherchhuan emaw, thawh hnih emaw a then hram tum nana heng tawngte hman tumna hi phuah chawp leh kaihlek tumna mai mai a ni tih i hria ang u.

**(RC Sproul-an 1Thes.4:13-18  Isua(Lalpa) lo kal lehnaa ringtuten kan han hmuak ang tih kha heti hian a sawifiah a:

“Isua lo kalna hi secret a ni lo(v.16). Kristaa muhil te thawhlehna a awm ang a, nung dama awmte taksa tihdanglamna a awm bawk ang a, anni rualin Lalpa lo kal kan han hmuak ang a, vanah min hruai bo daih dawn a ni lo, chu chu hmuak(apentesis) chu a ni. Roman sipai rual, captives-te nen hnehna(triumphal return) nen ropui takin an lo hawng a, Kulh pawnah mipuiin an lo hmuak a, a huhovin an haw thin, mipui hmuaktute chu Triumphal return-ah chuan an tel ve a, hnehtute zingah hnehtu angin khawpuiah an lo lut thin a ni” tiin.

Kohhran pa te: Justin Martyr, Irenaeus, Tertulian, Hyppolytus, Cyprian, Lactantius,Cyril ho zawng zawng te pawh khan tribulation pumpelha lei thleng lova Krista rawn kal tur thu an puang ngai lo, rupture hi an zirtir ngai lo hrim hrim bawk.

*******************************************************************************************

TRIBULATION HMAA RUPTURE HI AWM TAK TAK TURA KAN RIN CHUAN BIBLE ATANGIN HENGTE HI ENGTIN NGE KAN SAWIFIAH TAK ANG:

a) Mat 24 ah khan buh lem leh buh tak seng khawm hun chu khawvel tawp (aion=age) ah a ni daih zawk a, buhlem te chu hal tura lawr khawm hmasak tur an ni bawk si a, (Chhinchhiahna nghet tak putute pawh hi an la ni mahna…) Hei hi engtin nge kan sawifiah tak ang?

b) 2Thes.2:3 “Dan bawhchhepa, boral fapa chu a lo lan loh chuan chu mi ni chu a thleng dawn si lo.”“a lo kala inlarnain (parousia) a tiboral ang.”Tunge rawn inlar (parousia) tura chu – Messia Isua maw le. Tunge a tihboral tura chu? E le, Dan bawhchhepa, boral fapa ngei mai maw le.

Danbawhchhepa lo lan hmaa Lal Isua lo lan hmasak tir a, a mithianghlimte lawrtir tum daih hi eng nge a awmzia?

He thu a sawinaah hian rapture awm ringtuten rupture sawi nan taka Greek thumal an vawrh lar – PAROUSIA ngei mai  Paula hian a hmang a, mithianghlim hruai chhoh lam ni lovin Lal Isua lo kal lehna sawi nan a hmang daih si a, rupture nen a inkalh tih kan hmuthiam em?

Danbawhchhepa nen hian kan in tawng dawn tih sawina a ni zawk e. Rapture sawi khu vul chukho hian rapture hnuah Danbawhchhepa lang tur chauhvin mite zingah an sawi vak vak a. Tirhkoh Paula zirtirna nen chuan a inkalh chiang khawp mai!

c) Thlarau Thianghlim chu rapture rualin hlih a ni ang a, lakchhoh a ni daih ang a an ti thin a …. chuti a nih si chuan Danbawhchhepa tihduhdah tura an ngaih Juda (Jews)-te harh tharna ropui ber thleng tur chu Thlarau Thianghlim tel lovin em ni thung dawn? TT tel lovin an harh thei chiah ang maw? Chutia Thlarau Thianghlim tel lova Judate an harh chum chum chuan Antichrist chuan hna ava thawk tha awm ve! Pathian rawngbawltu ang mai, mi tam tak felnaa hawikir tirtu a ni thei chiah ang maw?

d) Thlarau Thianghlim kha kumkhuaa inhnena awm tur, tiin Lal Isuan a sawi a, chuti a nih chuan secret rupture ringtute sawi danah chuan kumkhua atana pek a ni chiah lo va, ni kin ni a thlen hma kum sariha hlih leh tur a lo ni chiah maw?

e) Secret rupture hi a lo thleng tak tak a nih phawt chuan chumi atanga kum 7 kan chhiar ang a, Lal Isua lo kal hun kan hre chiang thei ang..hmm…heti a nih chuan ‘ahun leh ni hriat loh’ tih kha a kalh ta chiah bawk ang.

f) Thupuan lamah chuan sakawlhin mithianghlimte a do leh a hneh phalsak a nih thu kan hmu a, mithianghlimte chhel taka awm a tulzia vawi 2 a sawi nawn ngat bawk. ‘Isua zuitu rinawm’ a tihte hi thlarau thianghlim tel lova harh thar Juda an ni thei chiah ang maw? Zuitu rinawm tih chuan a hma fe atanga lo zuitu a kawk nghal bawk e. Mitthi nih pawh ‘engthawlna’ ni hialin a sawi nghe nghe a ni zawk si a, pumpelh tur hian Bible hian min ti chiah maw?

g) Mithianghlim zz lawr daih an nih chuan leia sakawlh chhinchhiahna hi hman enge a tul kher na tur? Tu nge chhinchhiah leh hranpa ngai kher ang? Mithianghlim lote chu mi bawlhhlawh an ni mai dawn a, mibawlhhlawhte chu engvanga chhinchhiah leh kher ngai nge an nih ang? Sakawlh zuitute an ni sa vek dawn lawm ni? A nih loh leh chhandamna chang tur chuan martar a ngai tawh ang an ti thin a,  Thlarau Thianghlim vana lak chhoh a nihte chuan a tel lovin tunge martar ngam ang a, sakawlh tihduhdahna tuar chhuak thei reng ren ang?

h) Tin, thupuana puanvar sin te kha hrehawm tam tak tuar chhuak te an ni a, phhiladelphia kohhran kha ‘fiahna laka hum’ tur a ni bawk a, mahse ‘a chhelna thu lo pawm tawh, kal tlang tawh a nih vang a ni bawk. Rupture hi lo awm ta mial pawh ni se, Lal Isua hminga hrehawm leh tihduhdah la tuar ve lo tan lo beisei ve ngawt chi pawh a ni lo, mithianghlimte chanvo ‘lo beisei’ ve hi a zahthlak mah mah bawk. Kan nun inen vang vang ila, i duhzawngte, i ngaihtuahnate, i thil tih thinah te khan i thianghlim chiah ang maw? Chutiang beisei ngam tur chu kan ni chiah ang maw?

i). Nova dam laia THIL AWMZIA leh kan Lalpa lokallehna hi thu inthlawp tura ziak a ni a. Nova chhungte an damkhawchhuah mek laia THI ZOZAITE kha engati nge tuilet hnu kum sarih-ah an thih daih zawk loh? Emaw, secret rupture kan rin si chuan Nova te chhung kha tuilet hma kum 7 la awmin engvangin nge Pathianin a senghawi daih loh le?

Chutiang bawkin, Lota te chhungkaw member Sodom leh Gomorra khua atanga an tlanchhuah lai la la khan a ni lawm ni —mei leh kat rawn surin Sodom leh Gomorra mipuite kha a tihhlum phiar si ni? Lal Isuan a lo kal leh hun tur chungchang sawinaah, ‘sodom khua atanga Lota a chhuah ni ang kha a ni ang” a ti si a. Lota chhuah hnu kum sarih-ah mei leh kat a rawn sur zawk tihna em ni? Nge a hma kum 7 ah Lota khan Sodom khua a lo chhuahsan tawh zawk?

j) Rupture sawitute hian khawvel atanga lak chhuah tur niin an insawi a,

Yahshua tawngtainaah ve thung chuan

“Nangin anni chu khawvel ata i lak chhuah tura ngen ka ni lo va, misual lakah chuan i hum tur ka ti zawk a ni.” — John 17:15

“Hengho tan chauh hian ngensak ka ni lo, an thu avanga kei mi la ring turte tan pawh ngensak ka ni bawk e; an zaa pumkhat an nihna turin.” —John 17:20

Yahshua dilsakna nen khian a inkalh tih inhmu thiam em?

k) Hnam tin Isua zirtira siam hi khawvel hun tawp thlenga Kohhran mawhphurhna tura duan a ni – khawvel tawp hma KUM SARIH-ah kohhran chu a lawr chhoh daih mai chuan – Isua leh kohhran chuan an thu leh chanchin tha rawngbawl hna an hlen zo lo hle dawn tihna em ni?  (Thuhretu pahnihte kha tehkin thu ani tih an hrethiam lova,Thupuanah ngei hian thuhretu 2 te chu Olive thing pahnih leh Khawnvar dahna pahnih, khawvel lal hmaa dingte an ni tih a sawi. Thup.11:4 Hei hi chu a hranpain kan la sawi fiah dawn nia, Mosia leh Elija ni tura rupture ringtuten an sawi thin hi chu a dik lo.)

l) A lokal lehna tura intihderna awm ngei turah hian Secret Rapture hmanga bumna hna thawktu tur Diabola hian a.nei tha tawk tur a ni. Hei hi tawrhna pumpelh zawnga inzirtirna, a awm leh dawn si loh abanga mi tam tak bei tidawngtu tur leh an tluk phahna tur a setana bumna a ni tih hriat tel a tha e.